Օրենսդրական բարեփոխումներ առողջապահության ոլորտում

Հիմք ընդունելով ՀՀ տնտեսական ոլորտը կարգավորող իրավական ակտերի բարեփոխման խորհրդի 2012թ. ապրիլին կայացած նիստի արձանագրությունը՝ «Օրենսդրությունը կարգավորող ազգային կենտրոն» պետական հիմնարկն ուսումնասիրել է առողջապահության, մասնավորապես դեղերի հսկողության ոլորտը` նպատակ ունենալով կրճատել ու պարզեցնել այն կարգավորող իրավական ակտերը:

Կատարված աշխատանքի արդյունքում մշակվել են առաջարկներ, որոնք Օրենսդրության կարգավորման ազգային կենտրոնի տնօրեն Արմեն Եղիազարյանը ներկայացրեց ս.թ. օգոստոսի 1-ին ՀՀ կառավարության հերթական նիստում եւ որոնց հիման վրա կառավարությունն ընդունեց երեք որոշում:

Դրանք միտված են առողջապահության, մասնավորապես` դեղերի հսկողության ոլորտում բիզնես սկսելու պայմանների բարելավմանը, որպեսզի իրավաբանական անձինք և անհատ ձեռնարկատերերը տվյալ գործունեությամբ զբաղվեն առանց ավելորդ և անհիմն պահանջների և ծախսի: Կկրճատվեն նաև անհարկի վարչարարությունը և փաստաթղթաշրջանառությունը:

Համաձայն փաթեթի՝
Դեղերի արտադրության, դեղատնային գործունեության, բժշկական օգնության եւ սպասարկման լիցենզավորման ոլորտում.

1. Դեղերի արտադրության, դեղատնային գործունեության, բժշկական օգնության եւ սպասարկման լիցենզավորման կարգը համապատասխանեցվել է «Լիցենզավորման մասին» ՀՀ օրենքի պահանջներին, որի համապատասխան փոփոխություններ և լրացումներն ուժի մեջ են մտել 2013 թվականի հունիսի 15-ին (««Լիցենզավորման մասին» Հայաստանի Հանրապետության օրենքում փոփոխություններ և լրացումներ կատարելու մասին» ՀՕ-48-Ն ՀՀ օրենք, ընդունված 29.04.2013թ.):

2. Դեղերի արտադրության լիցենզավորման փուլում հայտատուի մոտ ստուգման պարտադիր պահանջը հանվել է, քանի որ լիցենզավորման հայտին պետք է կցվի GMP (ՊԱԳ) ստանդարտներին համապատասխանության վերաբերյալ փորձագիտական եզրակացությունը, որն իրականացվում է ՀՀ ԱՆ ենթակայության տակ գնվող ՓԲԸ կողմից և որի ընթացքում հայտատուի մոտ իրականացվում է համալիր ստուգում: Սահմանվել է, որ դեղատնային գործունեության, բժշկական օգնության և սպասարկման լիցենզավորման փուլում հայտատուի մոտ ստուգումները պետք է իրականացվեն ընտրանքային եղանակով, որի կարգը սահմանվում է ՀՀ առողջապահության նախարարի կողմից:

3. Նկուղներում և կիսանկուղներում դեղատնային գործունեության ծավալման արգելքը հանվել է:

4. Հանվել է դեղատների և դեղատնային կրպակների հիմնական տարածքներից առանձնացված մուտք ունենալու պարտադիր պահանջը:

5. Լիցենզավորման հայտերի ձևերը խմբագրվել են, որի արդյունքում հայտատուների կողմից լիցենզավորման հայտերին կից ներկայացվող այն տեղեկանքների և այլ փաստաթղթերի ներկայացման պահանջները, որոնք վերաբերում են այս կամ այն օրենքի պահանջներին համապատասխանությանը՝ հանվել են, քանի որ այդ պահանջներն արդեն իսկ սահմանված են յուրաքանչյուր կոնկրետ օրենքով:


6. Կրճատվել են հայտատուների կողմից լիցենզավորման հայտերին կից ներկայացվող որակական և մասնագիտական պահանջներին բավարարումը հավաստող փաստաթղթերի (դիպլոմ, վկայական, վկայագիր, հետբուհական մասնագիտական կրթություն, վերապատրաստում և այլն) պահանջը:

7. Լիցենզիայի տրամադրման հայտերի մերժման հիմքերից հանվել է «օրենքով և սույն կարգով նախատեսված այլ դեպքերում» մերժման հիմքը:

8. Սահմանվել է, որ լիցենզավորման հայտերում, հայտերին կից ներկայացված փաստաթղթերում առկա թերությունների, բացթողումների, անճշտությունների վերաբերյալ հայտատուներին լիցենզավորող մարմինը հայտը ստանալուց 2 աշխատանաքյաին օր հետո հայտատուին տեղյակ է պահում այդ մասին՝ հնարավորություն ընձեռելով տեղեկացվելոց հետո 5 աշխատանքային օրվա ընթացքում շտկել թերությունները կամ համալրել փաստաթղթերի ցանկը: Նախկինում վերոնշյալի համար ժամկետներ սահմանված չէին:

Բժշկական օգնության ու սպասարկման համար անհրաժեշտ տեխնիկական և մասնագիտական որակավորման որլորտում.

1. Հանվել է Հայաստանի Հանրապետության առողջապահության նախարարի այն իրավասությունը, որով նա սսմանում էր բժշկական հիմնական սարքավորումների շահագործման առավելագույն ժամկետները:

Լիցենզիաների վերաբերյալ ՀՀ առողջապահության նախարարության առողջապահական պետական տեսչությանը տեղեկացնելու հարաբերություններում.

1. Պարզ լիցենզիա ստացող անձանց կողմից ՀՀ առողջապահության նախարարության առողջապահական պետական տեսչությանը տեղեկացնելու պահանջըը հանվել է:

2. Սահմանվել է, որ լիցենզավորող մարմինը ինքը պետք է տեղեկացնի ՀՀ առողջապահության նախարարության առողջապահական պետական տեսչությանը պարզ ընթացակարգով տրամադրված լիցենզիաների վերաբերյալ, ինչպես որ դա ներկայումս արվում է բարդ ընթացակարգով տրվող լիցենզիաների պարագայում:

Բարեփոխումների խորհրդի մասին

ՀՀ Նախագահի՝ 2011թ. սեպտեմբերի 17-ի ՆՀ-246-Ն հրամանագրով ստեղծվել է Հայաստանի Հանրապետության տնտեսական ոլորտը կարգավորող իրավական ակտերի բարեփոխումների խորհուրդ: Խորհրդի նախագահը ՀՀ վարչապետն է: Խորհրդի կազմում են ՀՀ Նախագահի գլխավոր խորհրդականը, ՀՀ արդարադատության նախարարը, ՀՀ էկոնոմիկայի նախարարը եւ ՀՀ ֆինանսների նախարարը: ՀՀ Նախագահի հրամանագրով նախանշվել են բարեփոխումների գործընթացում ընդգրկվող 17 ոլորտները:

Օրենսդրության կարգավորման ազգային կենտրոնի մասին

ՀՀ կառավարության՝ 2011թ. հոկտեմբերի 13-ի N 1462-Ն որոշմամբ ստեղծվել է ՀՀ կառավարության աշխատակազմի Օրենսդրության կարգավորման ազգային կենտրոն ծրագրերի իրականացման գրասենյակ պետական հիմնարկը, որի հիմնական նպատակն է էականորեն կրճատել եւ պարզեցնել կարգավորում պարունակող իրավական ակտերը: Կենտրոնի գործունեությանն աջակցում են Եվրոպայում անվտանգության եւ համագործակցության կազմակերպությունը (ԵԱՀԿ), ՄԱԿ-ի զարգացման ծրագիրը, ԱՄՆ Միջազգային զարգացման գործակալությունը, Համաշխարհային բանկը եւ Ավստրիայի զարգացման գործակալությունը:

Հասարակայնության հետ կապերի պատասխանատու՝
Թամար Մինասյան
[email protected]        (+374 10) 53 22 87, 53 22 79, 53 22 57 * 107       

www.regulations.am

Հարցեր, պատասխաններ, մեկնաբանություններ